சுவாமி விவேகானந்தர் பேசுகிறார்...

சுவாமி விவேகானந்தர் பேசுகிறார்...

‘இவனை நம்பு’, அல்லது ‘அவனை நம்பு’ என்று சொல்வார்கள் சிலர். ஆனால் நான் சொல்கிறேன் கேள், ‘உன் மீது முதலில் நம்பிக்கை வை’, அது தான் ஒரே வழி. உன் மீது நம்பிக்கை வை - எல்லா ஆற்றலும் உன் உள்ளேயே உள்ளன - இதை உணர்ந்து உன் ஆற்றலை வெளிக்கொணர்ந்து வா. ‘என்னால் எதையும் சாதிக்க முடியும்,’ என்று சொல். நீ உறுதியாக மறுதலித்தால் பாம்பின் விஷம் கூட சக்தியற்றதாகிவிடும்.

எழுந்திருங்கள், உழையுங்கள், இவ்வாழ்வு எத்தனை நாள்?

இவ்வுலகில் தோன்றிய நீங்கள் ஏதாகிலும் விட்டுச் செல்லுங்கள்.

அப்படிச் செய்யாவிடில் மிருகங்களுக்கும், உங்களுக்கும் என்ன வித்தியாசம்?

நாத்திகன் யார்? தன்னம்பிக்கை இல்லாதவனே நாத்திகன். கடவுள் நம்பிக்கை இல்லாதவனை நாத்திகன் என்றன பழைய மரபுகள். தன்னம்பிக்கை இல்லாதவனை நாத்திகன் என்று நாம் கூறுவதே புதிய மரபு.

பெற்றோர் இல்லாதவர்கள் அனாதைகள் அல்ல.

ஆன்மிக குரு இல்லாதவனே அனாதை.

 ‘இல்லை’ என்று ஒருபோதும் சொல்லாதே, ‘என்னால் முடியாது’ என்று ஒரு நாளும் சொல்லாதே, ஏனெனில் வரம்பில்லா வல்லமை கொண்டவன் நீ. சர்வகாலமோ, பரந்த அண்ட வெளியோ கூட உன் உண்மை இயல்போடு ஒப்பிட்டால் ஒரு பொருட்டேயல்ல.

நீ எதையும், எல்லாவற்றையும் சாதிக்கக் கூடியவன். சர்வ வல்லமை படைத்தவன் நீ.

நம் ஒவ்வொரு எண்ணமும், நாம் செய்யும் ஒவ்வொரு செயலும், குறிப்பிட்ட ஒரு காலத்திற்குப் பிறகு சூட்சுமத் தன்மையை அடைகிறது.

பின்பு அது ஒரு வித்து போலாகி நம் சூட்சும உடலில் உறைகிறது.

மீண்டும் ஒரு காலத்திற்குப் பிறகு அது வெளிப்பட்டு அதற்குரிய பலனை அளிக்கின்றது.

 இந்தப் வினைப் பலன்களே மனிதனின் வாழ்க்கையின் தன்மையை நிர்ணயிக்கின்றன. இவ்விதம்மனிதன் தன் வாழ்க்கையை தானே உருவாக்கிக்கொள்கிறான்.

தனக்குத் தானே அமைத்துக் கொள்ளும் விதிகளைத் தவிர

வேறு எந்த விதிக்கும் மனிதன் கட்டுப்பட்டவன் அல்ல.

எனது துணிவுடைய இளைஞர்காள்! நீங்கள் அனைவரும்,

 பெருங் காரியங்களைச் செய்யப் பிறந்தவர்கள், என்ற நம்பிக்கை கொள்ளுங்கள்.

குட்டி நாய்களின் குரைத்தலைக் கண்டு அஞ்சாதீர்கள்!

நமது நாடு வீரர்களை வேண்டி நிற்கின்றது. வீரராகுக.

ஒரு கற்பாறையைப்போல் உறுதியாக நிற்பீராக.

மெய் எப்பொழுதும் வெல்கிறது.

நண்பா, அழுவதேன்? உமக்குள் எல்லாச் சக்தியும் உள்ளது.

பலவானே! உனது எல்லாம் வல்ல இயல்பை வரவழை.

மூவுலகமும் உன் காலடியில் அமரும்.

 வெல்வது ஆன்மா ஒன்றே. ஜடமன்று.

பலமே வாழ்வு, பலமின்மையே மரணம்.

 பலமே இன்பமும் நிலையான அழிவற்ற வாழ்வுமாம்.

நமது பலமின்மையே நம்மிடம் பொய்யும், களவும், கொலையும்,

வேறு பல பாவச்செயல்களும் இருப்பதற்கு காரணமாம்.

நமக்கு வேண்டிய ஒரே பொருள் பலமே.

 உலகத்தின் நோய்க்கு மருந்தும் பலமே.

எழுந்து நில்லுங்கள். பலமுடையவராகுங்கள், தைரியமாயிருங்கள்.

வாழ்க்கையை உங்கள் பிரியப்படி அமைத்துக் கொள்ளுங்கள்.

எல்லா விலங்குகளிலும், எல்லாத் தேவ தூதர்களிலும் பார்க்க மனிதனே உயர்ந்தவன்.

நாம் போதிய நெடுங்காலம் அழுதாயிற்று.

 இனியும் அழ வேண்டாம்.

எழுந்து நின்று ஆண்மையுடன் போராடுங்கள்.

நாம் பல பொருள்களைப்பற்றிக் கிளியைப்போல் பேசுகின்றோம். ஆனால்செயலளவிலில்லை.இதன் காரணம் யாது? உடற்பலவீனம்.

இவ்விதப் பலமற்ற மூளையால் ஒன்றையும் செய்யவியலாது. பலமுடையவராகுங்கள்.

நீதியாயிரு, தைரியமாயிரு, முழுமனதும் ஊன்றியவனாயிரு,

 பிறலாத ஒழுக்கமுடையவனாயிரு!

அறிவுக்குத் தொந்தரவு கொடாதே, கோழைகளே பாவம் புரிவர்.

தைரியசாலிகள், பாவம் புரியார், ஒவ்வொருவரையும் நேசிக்க முயல்க.

வஞ்சனையால் பெரும்பணி எதனையும் ஆற்ற முடியாது.

 அன்பாலும், சத்தியத்தாலும், பெரும் சக்தியாலுமே பெருங்காரியங்கள் நிறைவேறுகின்றன.

ஆ! நீங்கள் உங்களது இயல்பை மட்டும் உணர்வீரேல்,

நீங்கள் ஆத்மாக்களே, தெய்வங்களே!

நான் மெய்யைப் பின்பற்றி நிற்பவன்,

மெய் ஒருக்காலும் பொய்யோடு ஒன்று சேராது, சத்தியமே வெல்லும்!

இவ்வுலகம் கோழைகட்கன்று. ஓட முடியாத வெற்றியையோ, தோல்வியையோ கோராதே!

பழிவாங்குதலைப்பற்றி ஒருக்காலும் நான் யோசிப்பதில்லை, பேசியதுமில்லை. எப்பொழுதும் பலத்தைப்பற்றியே பேசியுள்ளேன்.

கடலைப் பார். அலையைப்பாராதே. எறும்பிற்கும் தேவ தூதனுக்கும், எவ்வித வேற்றுமையையும் பாராதே. ஒவ்வொரு புழுவும் இயேசுவின் சகோதரனாகும்.

சிவ பெருமானுக்குப் பணி செய்ய விரும்புவோன்,

அப்பெருமானின் மக்கட்குப் பணி செய்ய வேண்டும்!

நம் வாழ்நாட்களில் பெரும் பாகம் துக்கம் நிறைந்ததாகும் என்பது நம் எல்லாருக்கும் தெரிந்த விக்ஷயம். அதைத்தடுக்க எப்படி முயன்றாலும், அது வந்தே தீரும் என்பதையும் நன்கு அறிவோம்.

உலகத்தின் இன்பங்களைத் தேடுகின்றீர்களே! அனைத்துப் பேரின்பத்துக்கும் ஊற்றுக்கண் இறைவன் அன்றோ!

மகத்தான காரியங்களுக்கு மகத்தான நம்பிக்கைகளே பிறப்பிடம்.

மாபெரும் உண்மைகள், இவ்வுலகின் மிக எளிய விசயங்களே - நீ உயிரோடு இருப்பதைப் போலே!

நம் துன்பங்கள் அனைத்துக்கும் பெரும் காரணம் அச்சம்தான்.

ஓவ்வொரு துன்பத்திற்கு பின்னாலும் ஓர் அறியாமை உள்ளது.

நம்பிக்கை, நம்பிக்கை நம்மிடத்தில் நம்பிக்கை.

நம்பிக்கை, நம்பிக்கை கடவுளிடத்தில் நம்பிக்கை.

இதுதான் பெருமையின் ரகசியம்.

பிறருக்கு நன்மை புரிவதே புண்ணியம்.

பிறருக்கு தீமை புரிவதே பாவம்.

நீங்கள் பலம் பொருந்தியவர்கள் என்று எண்ணினால்,

 நீங்கள் பலமுடையவர்களாக ஆகிவிடுவீர்கள்.

மனித குலத்துக்கு சேவை செய்வது மிக உயர்ந்த இறை வழிபாடு ஆகும்.

லட்சியத்தில் எத்தனை கவனம் செலுத்துகின்றீர்களோ, அதே அளவு கவனத்தை லட்சியத்தை அடையும் வழியிலும் செலுத்துங்கள்.

பலவீனத்துக்கு மாற்று என்ன! பலவீனத்தைப் பற்றியே சிந்தித்துக் கொண்டிருப்பது அல்ல! பலத்தைப் பற்றி சிந்திப்பதே!

முற்றும் சுயநலமற்ற அன்பே உண்மை அன்பு, அதுவே இறையன்பு.

தன் காலில் நிற்க ஒருவனுக்கு எது உதவுமோ அதுவே உண்மையான கல்வி.

கல்வி என்பது என்ன? அது புத்தகங்களைப் படிப்பதா? இல்லை. எத்தகைய பயிற்சியின் மூலம் மனவுறுதியின் வேகமும், அதன்  வெளிப்படும் தன்மையும், கட்டுப்பாட்டிற்கு உட்பட்டு பயன் தரும் வகையில் அமைகிறதோ அந்தப் பயிற்சி தான் கல்வியாகும்.

மிருகத்தினை மனிதனாகவும், மனிதனைத் தெய்வமாகவும் எந்தக் கருத்து உயர்த்துமோ அதுவே சமயம் எனப்படும்.

நீ எதனை எண்ணுகிறாயோ அதுவாகவே ஆகிவிடுகின்றாய். நீ சிந்தித்துத் தான் ஆகவேண்டுமென்றால் நல்ல எண்ணங்களை மகத்தான எண்ணங்களை எண்ணுவாயாக.

ஒரே ஒரு ஆசிரியர் தான் உலகில் உண்டு.அனுபவம்தான் அது.

யாரையும் அவருடைய குறைகளை வைத்து எடை போடக்கூடாது.

 நிறைகளை வைத்து எடை போடு.

உதவி புரிவதை பற்றிய எல்லாக் கருத்துக்களையும் ஒன்றாகத் தொகுத்தால் அதற்குக் கடவுள் என்று பெயர்.

நீ எதையும் எல்லாவற்றையும் சாதிக்கக்கூடியவன். எல்லாம் வல்லவன் நீ.

எழுமின்! விழிமின்! வீரர்களே.. உலகம் துயரத் தீயால் வேகின்றதே நீங்கள் தூங்கலாமா?

பெரிய செயல்களைப் பெருந் தியாகத்தால் மட்டுமே செய்ய முடியும்.

தானத்தைவிட உயர்ந்த நன்மை வேறொன்றில்லை.

யாருடைய கை வாங்குவதற்காக நீளுமோ அவன் மிகத் தாழ்ந்தவன்.

எவனது கை கொடுப்பதற்காக முன் செல்லுமோ அவன் மிக உயர்ந்தவர்.

இயற்கையோடு புரியும் ஓயாத போரே மனித முன்னேற்றத்திற்கு வழி வகுப்பது; அதனோடு ஒத்துவாழ்வதல்ல.

உயிரே போகும் நிலை வந்தாலும் தைரியத்தை விடாதே !

நீ சாதிக்க பிறந்தவன் துணிந்து நில் , எதையும் வெல்.

செல்வம் படைத்தவன் செல்வம் இல்லாதவன் மேல் செலுத்தும் ஆதிக்கத்தைத் தவிர்க்க வேண்டும்.

அறிவுடையவன் அறிவு குறைந்தவன் மேல் செலுத்தும் ஆதிக்கத்தை விட வேண்டும்.

முப்பத்து மூன்று கோடிப் புராண தெய்வங்களிடத்தும், மேலும் அவ்வப்போது நம்மிடையே அன்னிய நாட்டவர் புகுத்தியிருக்கும் இதர தெய்வங்களிடத்தும், நம்பிக்கை இருந்தாலும் கூட, ஒருவனிடத்தில் தன்னம்பிக்கை இல்லாவிட்டால் அவனுக்குக் கதி மோட்சமில்லை.

பாவம் என்ற ஒன்று உண்டென்றால், அது நான் பலவீனமானவன், மற்றவர்கள் பலவீனமானவர்கள் என்று சொல்வது ஒன்றுதான்.

உனது கடந்த கால வாழ்க்கையை நீ பின்னோக்கித் திரும்பிப் பார்ப்பாயானால், நீ வீணாக எப்போதும் மற்றவர்களிடமிருந்து உதவியைப் பெற முயற்சி செய்ததையும் அப்படி எதுவும் வராமற் போனதையும் தான் காண்பாய்.

வந்த உதவிகள் எல்லாம் உனக்குள் இருந்தவையாகத்தான் இருக்கும்.

எவரிடமிருந்தும் எதையும் எதிர்பார்க்காதே. சுதந்திரமானவனாக இரு.

நம்பிக்கை! நம்பிக்கை! நம்மிடத்தில் நம்பிக்கை! கடவுளிடத்தில் நம்பிக்கை!

இதுவே மகிமை பெறுவதன் ரகசியமாகும்.

நீ எதை நினைக்கிறாயோ அதுவாகவே ஆகிறாய்.

 நீ உன்னைப் பலவான் என்று நினைத்தால் பலவானாகவே ஆகிவிடுகிறாய்.

அடக்கப்படாமல் சரியான வழியில் செலுத்தப்படாத மனம், நம்மை மேலும் மேலும் என்றென்றைக்கும் கீழே இழுத்துச் சென்றுவிடும். சரியான வழியில் செல்கின்ற மனம் என்றென்றைக்கும் காத்து ரட்சிக்கும்.

அனைவர் உள்ளும் இருக்கும் ஆன்மாவால் சாதிக்க முடியாத காரியம் என்று ஒன்று இருப்பதாக ஒருபோதும் நினைக்காதே, அப்படி நினைப்பது மிகப்பெரிய பிழை.

‘பாவம்’ என்று ஒன்று இருந்தால் அது இதுதான் - தன்னை பலவீனன் என்று நினைப்பது, அல்லது மற்றவரை பலவீனராக நினைப்பது.

வெற்றி பெறுவதற்கு தேவையானது முடிவில்லா விடாமுயற்சியும், அதீதமான நம்பிக்கையும் தான்….

விடாமுயற்சி கொண்டவன், ‘நான் சமுத்திரத்தையும் உட்கொள்வேன்’, ‘என் சங்கல்ப சக்தியால் மலைகளும் நொறுங்கி விழுந்துவிடும்’ என்று சொல்வான். அது போன்ற சக்தியை கொண்டிரு, அது போன்ற மன உறுதியை கொண்டிரு; நன்றாக உழைத்திரு, உனது குறிக்கோளை நிச்சயம் நீ அடைவாய்.

ஒரு சமயம் நான் காசியில் இருந்தபோது ஒரு பாதை வழியாக நடந்து சென்று கொண்டிருந்தேன். அந்தப் பாதையின் ஒருபுறம் நீர் நிறைந்த பெரிய குளமும், மறுபுறம் உயர்ந்த சுவரும் இருந்தன. குரங்குகள் பல உலாவும் இடம் அது. காசியின் குரங்குகள் பற்றியோ கேட்கவே வேண்டாம், மிகவும் பொல்லாதவை! இப்படி நான் நடந்து சென்று கொண்டிருக்கையில் அங்கிருந்த குரங்குகளுக்கு நான் அவ்வழியில் செல்வது பிடிக்கவில்லை போலும். நான் செல்லச் செல்ல அவை கிறீச்சிட்டுப் பெரும் சத்தமிட்டபடி என் கால்களை கௌவிக் கொண்டன. நான் தப்பித்து ஒட்டமிட்டேன், அவையும் பின்தொடர்ந்து துரத்தின. நான் வேகமாக ஒடினால் அவையும் அதைவிட வேகமாக துரத்தி வந்து என்னை கடித்தன. இதற்கு மேல் இக்குரங்குகளிடமிருந்து தப்பிக்க வழியே இல்லை என்று நான் நினைத்தபோது அவ்வழியில் வந்த ஒருவர், ‘குரங்குகளை எதிர்த்து நில்’ என்று என்னைப் பார்த்து கூவினார். அவர் சொல்படி நான் திரும்பி நின்று குரங்குகளை எதிர்த்தபோது அவை பின்வாங்கி ஒட்டம் பிடித்தன. வாழ்க்கை முழுமைக்கும் இது தான் படிப்பினையாகும் - எது உன்னை அச்சம் கொள்ளச் செய்கிறதோ அதை அஞ்சாமல் எதிர்த்து நில்.

உன் குறிக்கோளாக ஏதாவது ஒரு விஷயத்தை எடுத்துக்கொள். அந்த ஒரு விஷயத்தையே உன் வாழ்க்கை முழுவதும் நிரப்பு. அதைப்பற்றியே சிந்தனை செய், அதைப்பற்றியே கற்பனை செய், அதனூடேயே வாழ். உன் மூளை, தசை, நரம்புகள், உடலின் ஒவ்வொரு பாகமும் அந்த விஷயத்தாலேயே நிறைந்திருக்கட்டும், மற்ற எல்லா ஆசைகளையும் எண்ணங்களையும் தவிர்த்துவிடு. வெற்றிக்கு இதுவே வழி.

நாம் உண்மையிலேயே மேன்மை பெற - மற்றவர்களும் மேன்மை அடைய உதவ - நம்முள் நாம் மேலும் மேலும் ஆழந்து சென்றாக வேண்டும்.

நாம் எவ்வளவு அதிகமாக ஒரு விஷயத்தில் கவனம் செலுத்துகிறோமோ அவ்வளவு அதிகமாக அவ்விஷயம் பற்றிய ஞானம் நமக்கு கிட்டும். ஞானம் அடைய இதுவே வழி.

மிகவும் தாழ்ந்தவனாக கருதப்படும் செருப்பு தைப்பவன் கூட, அவன் வேலையில் அதிக கவனம் செலுத்தினால் அவன் வேலையை மேலும் சிறப்பாகச் செய்வான். சமையல் செய்பவன் கவனத்துடன் தன் வேலையைச் செய்தால் சுவையான உணவுகளை சமைப்பான். பணம் சம்பாதிப்பதோ, கடவுளை வழிபடுவதே, எந்த காரியமாக இருந்தாலும் சரி, எவ்வளவு கவனம் செலுத்தப்படுகிறதோ, அவ்வளவு சிறப்பாக பயன் அமையும்.

கட்டுப்பாடற்ற, நல்வழி படுத்தப்படாத மனம் நம்மை கீழ்நோக்கி இழுத்து அழித்துவிடும். கட்டுப்பட்ட, நல்வழி படுத்தப்பட்ட மனமோ நம்மை காத்து இரட்சிக்கும், நம் உண்மையான விடுதலைக்கு வழிவகுக்கும்.

நாம் இப்போது இருக்கும் நிலைமைக்கு நாமே பொறுப்பாளிகள். நாம் எப்படி எல்லாம் இருக்க வேண்டும் என்று விரும்புகிறோமோ அப்படி நம்மை அமைத்துக்கொள்ளும் ஆற்றல் நம்மிடமே உள்ளது.

 நாம் இப்போது இருக்கும் நிலை நம் முன்வினைகளின் பலன் என்றால், எதிர்காலத்தில் நாம் எப்படி இருக்க வேண்டும் என்று விரும்புகிறோமோ அதை நாம் நம்முடைய தற்போதைய செயல்களால் உண்டாக்கிக் கொள்ள முடியும் என்பது வெளிப்படை. எனவே எப்படி நடந்துகொள்ள வேண்டும் என்பதை நாம் தெரிந்துகொள்ள வேண்டும்.

உனக்குள் இருக்கும் ஆற்றலை நீ தான் வெளிக்கொணர்ந்து முன்னேற வேண்டும். வேறு யாரும் உனக்கு கற்பிக்க முடியாது, உன்னை ஆன்மீகவாதி ஆக்கி விடவும் முடியாது.

உன்னுள் உள்ள ஆன்மாவைத் தவிர வேறு ஆசான் எவருமில்லை.

மக்கள் பொதுவாக தங்கள் வாழ்வின் குறைபாடுகளுக்கெல்லாம் மற்றவர்களே காரணம் என்று பழி சுமத்துகிறார்கள், அது முடியாவிட்டால், கடவுள் மீது பழி சுமத்துகிறார்கள். அல்லது புதிதாக பேய் பிசாசு என்று கற்பித்துக்கொண்டு அதை தலைவிதி என்று சொல்கிறார்கள்…. விதி எங்கிருந்து வந்தது? விதி என்றால் என்ன? எதை விதைத்தோமோ அதைத் தான் அறுவடை செய்கிறோம். நம் தலைவிதியை எழுதுவது நாமே தான், அதற்கு வேறு எவர் மீதும் பழிசுமத்த வேண்டியதில்லை, வேறு எவரையும் புகழவும் வேண்டியதில்லை. காற்று வீசுகிறது, எவரெவர் தத்தம் பாய்மரத்தை அதற்கு சாதகமாக வைத்துக் கொள்கிறார்களோ அவர்கள் முன்னேறுகிறார்கள். பாய்மரத்தை சுருட்டி வைத்துக் கொண்டவர்களோ எங்கும் செல்வதில்லை, இது காற்றினுடைய குற்றமா?

உனக்கு நீயே இவ்வாறு சொல்லிக்கொள் - ‘நான் அனுவபிக்கும் இந்த துன்பத்திற்கு என் செயல்களே காரணம். அதனால், என் ஒருவனால் மட்டுமே இந்த துன்பத்தை நீக்க முடியும்.’ என்னால் எது படைக்கப்பட்டதோ அது என்னால் தான் அழிக்கப்பட வேண்டும். பிறரால் படைக்கப்பட்டது என்றால் அதை ஒருபோதும் என்னால் அழிக்க முடியாது. எனவே, எழுந்து நில், தைரியத்துடன் இரு, வலிமையுடன் இரு. எல்லா பொறுப்புகளையும் உன்னுடைய தோள்களின் மீது சுமந்துகொள், உன் விதியை படைப்பவன் நீயே என்பதை புரிந்துகொள். உனக்கு தேவையான எல்லா வலிமையும் உதவியும் உன் உள்ளேயே உள்ளன.

உன் எதிர்காலத்தை நீயே சுயமாக உருவாக்கு. இதுவரை நடந்ததெல்லாம் நடந்து முடிந்துவிட்டது, அதுபற்றி வருந்தாதே. எல்லையற்ற எதிர்காலம் உன் முன்னால் பரந்து விரிந்து கிடக்கிறது.

உன் ஒவ்வொரு சொல்லும், ஒவ்வொரு செயலும், ஒவ்வொரு சிந்தனையும் உன் எதிர்காலத்தை செதுக்குகிறது என்பதை எப்போதும் நினைவில் கொள்.

தீய எண்ணங்களும் செயல்களும் புலிகளைப் போல் உன் மீது பாய்ந்து தாக்க எப்போதும் தயாராக இருக்கின்றன, எனினும் உனது நல்ல எண்ணங்களும் செயல்களும் ஓராயிரம் தேவதைகளின் ஆற்றலுடன் உன்னை எப்போதும் காப்பதற்கு தயாராக இருக்கின்றன என்ற ஊக்கமளிக்கும் நம்பிக்கையும் உள்ளது.

நீ எதை நினைக்கிறாயோ அதுவாகவே ஆகிறாய். நீ உன்னைப் பலவீனன் என்று நினைத்தால் பலவீனனாகவே ஆகிவிடுகிறாய். நீ உன்னை வலிமையுடையவன் என்று நினைத்தால் வலிமை படைத்த வனாகவே ஆகிவிடுவாய்.

மனிதன் தோல்வியின் மூலமே புத்திசாலி ஆகின்றான்.

பிறரிடமிருந்து நல்லனவற்றைக் கற்றுக் கொள்ள மறுப்பவன், இறந்தவனுக்கு ஒப்பாவான்.

காயம்படாதவன் தான் தழும்மைக் கண்டு நகைப்பான்.

உடலிலும் மனதிலும் வலிமை இல்லாமல் போனால் ஆன்மாவை அடைய முடியாது.

நீ உன்னைப் பலவீனன் என்று ஒரு போதும் சொல்லாதே. எழுந்து நில். தைரியமாக இரு. வலிமையாக இரு. பொறுப்பு முழுவதையும் உன் தோள் மீதே சுமந்து கொள்.

மக்களுக்கு சேவை செய்யும் தொண்டே மகேசனுக்குச் செய்யும் தொண்டு.

நாத்திகனுக்கு தருமசிந்தனை இருக்கலாம். ஆனால் மதகோட்பாடு இருக்க இயலாது. மதத்தில் நம்பிக்கை வைத்தவனுக்கு தருமசிந்தை அவசியம் இருக்க வேண்டும்.

என் குறிக்கோளை உண்மையில் ஒரு சில வார்த்தைகளில் சொல்லி விடலாம். அதாவது, மக்களுக்கு அவர்களுடைய தெய்வீகத் தன்மையை எடுத்து போதிப்பதும், இந்த தெய்வீகத்தை வாழ்க்கையின் ஒவ்வொரு நிகழ்விலும் எவ்வாறு வெளிக்கொணர்வது என்பதை எடுத்துச் சொல்வதும் தான்.